Maksim Medvedev: “Çox tez oynayırdılar, biz isə yorulurduq“
"Oyun barədə çox danışmaq alınmayacaq. Çünki görüşü analiz etmək lazımdır".

Bunu Azərbaycan millisinin kapitanı Maksim Medvedev evdə Serbiya yığmasına 1:2 hesabı ilə uduzduqları dünya çempionatının seçmə mərhələsinin matçından sonra deyib.

Futbolmedia.az xəbər verir ki,32 yaşlı müdafiəçi çoxlu səhv buraxdıqlarını və nəticədə rəqibin 2 qol vurduğunu bildirib: "Rəqib futbolçular topla rahat davranır, hücumlar qururdular. Bizdə isə alınmırdı. Onları yaxşı bağlamağa çalışırdıq. Amma səviyyə fərqi hiss olunurdu. Çox tez oynayırdılar, biz isə yorulurduq. Hardasa çatdırmırdıq, nəticədə qol görürdük. Baş məşqçi ilə oyunu analiz etməliyik".

Medvedevin sözlərinə görə, eyni səhvləri təkrarlamaq olmaz: "Bütün rəqiblərimiz analoji futbolu sərgiləyir, yenə qol vura bilərlər. Oyun barədə baş məşqçi ilə söhbətimiz olacaq. Canni De Byazi hər bir futbolçuya özəl tapşırıqlar verir. O, futbolçularla danışanda səhvlərini deyəcək"

Xəbər 862 dəfə oxundu.